good

ഒരുപക്ഷെ മലയാളത്തിലെ ഏറ്റവും പ്രശസ്തമായ ആത്മകഥയായിരിക്കും കണ്ണീരും കിനാവും.പുറന്താൾ കുറിപ്പിൽ സൂചിപ്പിക്കുന്നതു പോലെ അക്ഷരാർത്ഥത്തിൽ കേരളത്തിന്റെ സാമൂഹ്യ നവോത്ഥാനത്തിനു നേരെ പിടിച്ചൊരു കണ്ണാടിയാണു ഈ കൃതി. വായിച്ചിട്ടില്ലാത്തവർക്കു പോലും സുപരിചിതമായ 'മാന്മാർക്ക്‌ കുട പോലെ' ആധുനിക കാലത്തെ മിത്തുകൾക്ക്‌ സമാനമായ്‌ ഘോഷിക്കപ്പെടുന്ന ഒട്ടനേകം സന്ദർഭങ്ങളാം സമ്പന്നമായ ഈ കൃതി ഓരോ വായനക്കാരനും നിർബന്ധമായും വായിച്ചിരിക്കേണ്ടുന്ന കൃതിയാണു...

കുടുമയും പൂണൂലും മനുഷ്യ മനസുകളിൽ അന്ധകാരം നിറച്ചപ്പോൾ, സ്ത്രീകളെ അകത്തളങ്ങളിലും അടുക്കളയിലും തളച്ചിട്ടപ്പോൾ,അതിനെതിരെ ഉയർന്ന ധീര ശബ്ദമായിരുന്നു വി ടി ഭട്ടതിരിപ്പാട്. ആത്മാംശത്തിൻറെ നിഴലും നിലാവും പൂർണമായി ഉപയോഗിച്ച്, അനുഭവത്തിന്റെ തീചൂളയിൽ ഒരുക്കി ശുദ്ധീകരിച്ച തൻ്റെ ജീവിതം 'കണ്ണീരും കിനാവും' എന്ന അത്മകഥയിലൂടെ അദ്ദേഹം അവതരിപ്പിക്കുന്നു. ബ്രാഹ്മണനായി നിന്നുകൊണ്ട് ബ്രാഹ്മണ്യത്തിൻ്റെ മലിനതകളെ തുറന്നുകാട്ടുകയാണ് അദ്ദേഹം. പാരമ്പര്യത്തിനുമേൽ അന്ധമായ ഒരു മമതാബന്ധം ഒട്ടിനിൽക്കുന്നുണ്ടെങ്കിലും അതിൻ്റെ പുഴുക്കുത്തുകൾ ലോകത്തോടു വിളിച്ചു പറയുവാൻ 'രാമൻ താഴ' മെന്ന ആ അപ്ഫൻ നമ്പൂതിരി തുനിഞ്ഞിറങ്ങി. കണ്ണീരും കിനാവിലുമുടനീളം ഇല്ലത്തിനുള്ളിലെ സ്ത്രീകളുടെയും അപ്ഫൻ നമ്പൂതിരിമാരുടെയും മറ്റു അനാചാരങ്ങളുടെയുമെല്ലാം വിവരണങ്ങളുണ്ട്. പൂമുഖപടിയിലും ബലിക്കൽപുരയിലും തവളമടിച്ചു പുല്ലും ചമതയും ശേഖരിച്ചു പവിത്രം കെട്ടിയും അഴിച്ചും നാൾ പോകുന്ന അപ്ഫൻ നമ്പൂതിരിമാരും,ഒരൊളിസേവക്കാരിയായ മിസ്ട്രിസ്‌നു ദുർമുഖത്തോടെ വിളമ്പിക്കൊടുത്തതിനു അഗ്നിസാക്ഷിയായി വിവാഹം ചെയ്ത കുലപത്നിയെ രാത്രി പുറത്താക്കി വാതിലടച് , ആ സ്ത്രീയുമായി രാസക്രീഡ നടത്തിയ 'മൂസാബൂതിരിമാരും' വി ടി യെ നിശബ്ദനായി തുടരാൻ അനുവദിച്ചില്ല. അത്മകഥയുടെ പകുതികഴിഞ്ഞു 'ഗുരുകുലവാസം' എത്തുമ്പൊഴേക്കും കണ്ണീരിനൊപ്പം കിനാവുകളുടെ മറ്റൊരു കാലം കൂടി അനുവാചകർക്ക്‌ ലഭിക്കുന്നു. നങ്ങേമയും അമ്മുക്കുട്ടിയുമൊക്കെ കിനാവുകളുടെ വർണശബളവും വികാരതരളിതവുമായ ലോകത്തെ ചിത്രികരിക്കുന്നു. തീയാടി പെൺകുട്ടിയുടെ ശിക്ഷ്യത്യം സ്വീകരിച്ചുകൊണ്ട് അക്ഷര ജ്ഞാനത്തിലൂടെ കിനാവുകളുടെ വലിയ ലോകത്തിലേക്ക് വി ടി പ്രവേശിക്കുന്നു. മറകുടയുടെയും പൂണുലിൻ്റെയും അധീനതയിൽ ജീവിച്ച ഭ്രാഹ്മണ ആഢ്യത്വത്തിനെതിരായി തിരിഞ്ഞാൽ ക്രൂരമായ എതിർപ്പുകളുണ്ടാകുമെന്നു വി ടി യ്ക്കു അറിയാമായിരുന്നു.അതിനാൽ തന്നെയാണ് പാലുണ്ണിയെപ്പോലെ വൃത്തികെട്ട വിശ്വാസങ്ങൾ നുള്ളിപൊട്ടിക്കാൻ വി ടി ശ്രമിച്ചത്. ഭ്രഷ്ട് കൽപ്പിച്ചു ഒറ്റപ്പെടുത്താൻ ശ്രമിച്ചുവെങ്കിലും ധീരോദാത്തമായ വി ടി യുടെ നവോഥാന പ്രവർത്തനങ്ങളാണ് നമ്പൂതിരിയെ മനുഷ്യനാക്കിമാറ്റിയത്. ആത്മകഥയെ രണ്ടായി ഭാഗിച്ചാൽ ആദ്യ പകുതി കണ്ണീരും പിന്നീടങ്ങോട് കിനാവുകളും കാണാം. ഇവ രണ്ടും ചേർന്നതാണു ജീവിതമെന്ന സത്യത്തെ ഉൾകൊള്ളാൻ പര്യാപ്തമായ കൃതിയാണ് കണ്ണീരും കിനാവും.

.