ഏറ്റവും പ്രശസ്തമായ പുസ്തകങ്ങളിലൊന്നാണ് സാറാ ജോസഫിന്റെ ആലാഹയുടെ പെൺമക്കൾ. വികസനവും, നാഗരികതയും പുറന്തള്ളിയ ഒരു പ്രദേശവും, അവിടുത്തെ ജനജീവിതവും, തിരസ്കരിക്കപ്പെടുന്ന ജീവിത സാഹചര്യത്തിൽ നിന്നും അതിജീവനത്തിനായി സ്വയം യുദ്ധം ചെയ്യുന്ന സ്ത്രീകളുമാണ് ഈ നോവലിന്റെ ഉള്ളടക്കം. ആ പ്രദേശത്തിന്റെ തന്നെ ആയുധമാവുകയാണ് ആലാഹയുടെ നമസ്ക്കാരം.ആനി എന്ന എട്ട് വയസുകാരിയുടെ മനസിലാക്കലുകളിലൂടെയും വികാസത്തിലൂടെയുമാണ് നോവൽ മുന്നോട്ട് പോകുന്നത്.ആനിയും, അമ്മൂമ്മയും, അമ്മയും, കുട്ടിപ്പാപ്പനും, മൂന്ന് അമ്മായിമാരും, അമരവള്ളിയും ഉൾകൊള്ളുന്ന കുടുംബമാണ്‌ നോവലിന്റെ കേന്ദ്രബിന്ദു. അമരപന്തലിന് താഴെ ആനിയും, അമ്മാമ്മയും കിളച്ചുകൊണ്ടിരിക്കുമ്പോൾ അമ്മാമ്മ ഒരു അസ്ഥിക്കൂടം കാണുകയും, ആഞ്ഞുത്തുപ്പികൊണ്ട് ആലാഹയുടെ നമസ്കാരം ഉരുവിടുന്നതിലൂടെയുമാണ് നോവൽ തുടങ്ങുന്നത്. കോക്കാഞ്ചിറ എന്ന പ്രദേശത്തിലെ മനുഷ്യർ ആലാഹയുടെ നമസ്കാരത്തെ ആശ്രയിച്ചിരുന്നു. ആ നാട്ടിൽ ആലാഹയുടെ നമസ്കാരം അറിയുന്ന ഒരേയൊരു വ്യക്തി ആനിയുടെ അമ്മാമ്മയാണ്. ആനിയുടെ വീട്ടിലെ ആൺ തരിയെന്നത് ക്ഷയരോ​ഗിയായ കുട്ടിപ്പാപ്പനാണ്. എല്ലാതരത്തിലും ജീവിതം നയിക്കാനായി സ്വയം പൊരുതി മുന്നേറുകയാണ് ആലാഹയുടെ പെൺമക്കൾ. ശവശരീരങ്ങളും, മനുഷ്യ വിസർജനവും തള്ളിയിരുന്ന കോക്കാഞ്ചിറയെ മറ്റുള്ളവർ അറച്ചിരുന്നു. പ്രദേശത്തിന്റെയും ജനതയുടെയും സ്വത്വം നശിപ്പിച്ചുകൊണ്ട് നാഗരികതയും വികസനവും കോക്കാഞ്ചിറയെ കീഴടക്കി. ആ പ്രദേശത്തെ, വികസനം വിഴുങ്ങുമ്പോൾ അമരപന്തലിന്റെ ഒരു ഭാഗം നഷ്ടപ്പെടുന്നു, ആകാശത്തിനും മതിൽ കെട്ടിമറച്ചതായി ആനിയ്ക്ക് തോന്നുന്നു. വികസനത്തിന്, നിസ്സഹായരായ മനുഷ്യരുടെ മറുപടിയെന്നോണം കനത്ത മഴ പ്രളയം സൃഷ്ടിക്കുന്നു. നോവലിന്റെ അവസാന ഭാഗത്ത് ആനി ആലാഹയുടെ നമസ്കാരം അറിയുന്നിടത്ത് വായനക്കാരുടെയുള്ളിൽ നോവലിന്റെ പുതിയ ഒരു ഏട് തുറക്കുകയാണ് സാറാ ജോസഫ്.

വിഭാഗീയതകളുടെ കട്ടിയുറകള്‍ വലിച്ചിട്ട്, മനുഷ്യരെ വേര്‍തിരിക്കുന്ന വലിയ ലോകങ്ങള്‍ക്കും മനുഷ്യര്‍ക്കുമിടയില്‍ ചരിത്രത്തില്‍ ഇടമില്ലാത്ത ‘ഒരിടം’. അവിടെ “അര്‍ത്ഥമറിയാത്ത വാക്കുകളെ കുട്ടികളായി മുന്നിലിരുത്തി , അവയുടെ തുടയടിച്ചു പൊട്ടിക്കുന്ന കുട്ടി”. അവകാശികളില്ലാത്ത ആത്മാക്കള്‍ ഉറങ്ങുന്ന കൊക്കാഞ്ചിറയും കൊടിച്ചിയങ്ങാടിയും നരച്ചു മുഷിഞ്ഞ പെറ്റികോട്ടും അനുസരണയില്ലാത്ത ചുരുളന്‍ മുടിയുമുള്ള ആനിയുടെ കണ്ണുകളിലൂടെ സാറാ ജോസഫ്‌ കാണിച്ചു തരുമ്പോള്‍ പല കഥകളുടെ വൈരുദ്ധ്യങ്ങള്‍ക്കിടയില്‍ സ്വയം നിര്‍മ്മിക്കുവാനും നവീകരിക്കപ്പെടുവാനുമുള്ള ഒരു വിഭാഗം മനുഷ്യരുടെ നിരന്തര ശ്രമങ്ങളെ പ്രശ്നവത്ക്കരിക്കുകയാണ്. ഒപ്പം സ്ത്രീമനസുകളുടെ ഉള്ളടരുകളും ഉള്ളുലച്ചിലുകളും ലളിതമായി അവതരിപ്പിക്കുവാനും എഴുത്തുകാരിയ്ക്ക് സാധിച്ചിട്ടുണ്ട്. അമ്മാമ്മയും അമ്മയും ചിയ്യമ്മയും കറുത്ത കുഞ്ഞാറവുമെല്ലാം പ്രതിസന്ധികളും പ്രതിബന്ധങ്ങളും പെണ്‍പിറപ്പുകളുടെ ജീവിതത്തോട് പിരിച്ചെഴുതാനാവാത്ത വിധം ചേര്‍ത്ത് വയ്ക്കുന്ന സാമൂഹിക ക്രമത്തിന്‍റെ സൃഷ്ടികള്‍ തന്നെയാണ്.തളിര്‍ത്തുപൂക്കുന്ന അമരവള്ളികള്‍ക്കിടയിലൂടെ തെന്നിയിറങ്ങുന്ന സൂര്യവെളിച്ചം അവരുടെ പ്രതീക്ഷയെ കുറിക്കുന്നു. അതെ സമയം സ്ത്രീ പക്ഷ വായന എന്നതിനേക്കാള്‍, ഉള്ളും ഉള്ളതും നഷ്ടപ്പെട്ട്, താഴ്‌ന്നുപോകുന്നവന്റെ പക്ഷം ചേര്‍ന്നുള്ള വായനയാണ് പുസ്തകം മുന്നോട്ട് വയ്ക്കുന്നത്. നഗരം തിരസ്ക്കരിക്കുന്ന മനുഷ്യരുടെയും ജഡങ്ങളുടെയും അഭയമായ കൊക്കാഞ്ചിറയുടെ മണ്ണിനോട് ചേര്‍ന്ന് നില്‍ക്കുന്ന കഥാപാത്രങ്ങളില്‍ ആനിയുടെ കുട്ടിപ്പാപ്പനാണ് ഏറെ മിഴിവോടെ നില്‍ക്കുന്നത്. ഇസ്തിരിയിട്ട്, അടുക്കിയതു പോലുള്ള വാക്കുകളിലൂടെ അയാള്‍ പറഞ്ഞ് വയ്ക്കുന്നത് രാഷ്ട്രം എന്ന വലിയ സങ്കല്‍പ്പത്തില്‍ ഓരോ ദേശത്തിനും അതിലെ മനുഷ്യര്‍ക്കും ജാതി, മത, വര്‍ണ്ണ, വര്‍ഗ്ഗ ഭേദമന്യേയുള്ള പങ്കിനെ കുറിച്ച് തന്നെയാണ്. സാമ്പത്തിക അസമത്വങ്ങളുടെയും വര്‍ഗവ്യത്യാസങ്ങളുടെയും ലോകത്ത് , ഒരു മുറികൂടാ മുറിവ് പോലെ ജീവിക്കുന്ന മനുഷ്യരെ, പ്രത്യേകിച്ച് സ്ത്രീകളുടെ അതിജീവന ശ്രമങ്ങളെ അതിന്റെ എല്ലാ ഭംഗിയോടും കൃത്യതയോടും അവതരിപ്പിക്കുന്നതിലും കഥാപാത്ര സൃഷ്ടിയിലും, കഥാ സന്ദര്‍ഭങ്ങളിലും എഴുത്തുകാരി നടത്തിയ ചിട്ടയായ ഗവേഷണം പുസ്തകത്തെ കൂടുതല്‍ കാമ്പുള്ളതാക്കുന്നു. ബിൻസി മരിയ കണ്ണൂർ

സംസ്ക്കാരത്തിനും ഭാഷയ്ക്കും സംഭവിക്കുന്ന അപചയങ്ങളും തിരസ്ക്കരണവും ലോകം ചർച്ച ചെയ്യപ്പെടട്ടേയെന്ന ഉദ്ദേശ്യശുദ്ധിയോടെ സാഹിത്യ വ്യവഹാരങ്ങൾ എല്ലാക്കാലവും എഴുതപ്പെട്ടിട്ടുണ്ട്. സംസ്കൃതിയുടെ അന്തർലീനമായ അടിവേരുകൾ ചികഞ്ഞുകണ്ടെത്താൻ സാഹിത്യകാരന്മാർക്ക് കഴിയുന്നതുപോലെ മറ്റാർക്കും സാദ്ധ്യമല്ലെന്നതും സത്യം.ഈ സ്ഥിതിവിശേഷത്തിന്മേലാണ് സാറാ ജോസഫിൻ്റെ ''ആലാഹയുടെ പെൺമക്കൾ"ഭാഷയുടേയും സംസ്ക്കാരത്തിൻ്റെയും വിശ്വാസത്തിൻ്റെയും സ്തുതിഗീതങ്ങളായനുവർത്തിക്കപ്പെടുന്നത്.ഇരട്ട പാർശ്വവൽക്കരണത്തിനു വിധേയമാകുന്ന കീഴാള സ്ത്രീത്വത്തിൻ്റെ പുറപ്പാടാണ് നോവൽ സംവദിക്കുന്നത്.ആനിയുടെ വികാരവിചാരങ്ങൾ ഭാഷയ്ക്കുമേലുള്ള അമരവള്ളിത്തളിർപ്പുകളിലെ വസന്തമാകുമ്പോൾ"ഇതിൻ്റെ തുഞ്ചത്ത് അതിശയകരമായ ലോക"മുണ്ടെന്ന തിരിച്ചറിവ് വായനക്കാരൻ നേടുന്നു.വി.ഗ്രന്ഥത്തിൽ പരാമർശിച്ചിട്ടില്ലാത്ത ആലാഹയുടെ നമസ്കാരം നോവലിൻ്റെ ' ഉൽപത്തി ' മുതൽ 'വെളിപാട് ' വരെ നീളുമ്പോൾ രക്ഷാകരദൗത്യം ആനിയിലേക്ക് വന്നുചേരുന്നിടത്താണു നോവലിൻ്റെ പര്യവസാനം.ഒപ്പം കോക്കാഞ്ചിറയെന്ന പ്രദേശത്തിൻ്റെ വിശ്വാസപുരാണങ്ങളും കാലാതീതമായി കടന്നെത്തുന്ന വ്യത്യസ്തധാരാ വിശ്വാസങ്ങൾ,അവയുടെ സ്വാധീനം,അപചയം തുടങ്ങി സകല സാമൂഹ്യ വ്യവഹാരങ്ങളിലൂടെയും നോവൽ കടന്നുപോകുന്നു. നിലനിൽപ്പിനായുള്ള പ്രതിരോധം ഇവിടെ കാണാം. എഴുത്തുകാരി സൃഷ്ടിച്ചെടുത്തിരിക്കുന്ന ആനിയുടെ കുടുംബം - വ്യത്യസ്ത പ്രത്യയശാസ്ത്രങ്ങൾ, രാഷ്ട്രീയ നിരീക്ഷണങ്ങൾ, മതാചാരവിശ്വാസങ്ങൾ എന്നിവയുടെ സ്വതന്ത്ര്യാശയാവിഷ്ക്കരണം സാദ്ധ്യമാക്കുന്ന ലിംഗസമത്വ മാതൃകാ ജനാധിപത്യ കുടുംബ വ്യവസ്ഥിതിയാണ്.ഇവിടെ സ്ത്രീപക്ഷ വായനയ്ക്കുതകുന്ന സാധ്യതകൾ തള്ളിക്കളയാനാകില്ല. സംസ്ക്കാരത്തിൻ്റെ പ്രകട ചിഹ്നമായ ഭാഷയ്ക്ക് സംഭവിക്കുന്ന അപചയം നോവലിലുണ്ട്.കോക്കാഞ്ചിറയെന്ന ദേശവും അതിൻ്റെ തനതു ചരിത്രവും കെട്ടുകഥകളും ഇഴപിരിഞ്ഞെടുക്കാനാകാത്ത വിധം ഭാഷാ തൊങ്ങലുകളുമായി അവതരിപ്പിക്കപ്പെടുമ്പോൾ ഒരു കഥയിലെ അനേകം കഥകൾ വായനാനുഭവത്തിൻ്റെ സ്വാദ് കൂട്ടുന്നു അങ്ങനെ നോവലിൻ്റെ ആരംഭത്തിലെ ആനി വെളിപാടു ലഭിക്കുന്ന പ്രവാചകയായ് രൂപാന്തരം പ്രാപിക്കുന്നിടത്തു അനുയാത്ര ചെയ്തുവന്ന വായനക്കാരനടങ്ങുന്ന വായനാസമൂഹം ഒരു നാടിൻ്റെ ഉൽപത്തി മുതൽ വെളിപാടുവരെ ദർശിക്കുന്നു.

Good