കരൻ ആംസ്ട്രോങ്ങ് എഴുതിയ ഇസ്ലാം സ്ഥാപകനായ പ്രവാചകൻ മുഹമ്മദിന്റെ ഈ ജീവചരിത്രം വളരെ നീതി പുലർത്തിയിട്ടുണ്ട് എന്നാണ് മനസ്സിലാക്കുന്നത്. ഒരു അമുസ്ലിം പക്ഷപാതപരമോ കൃത്യതയില്ലാത്തതോ തെറ്റിദ്ധരിപ്പിക്കുന്നതുമായ വിവരണങ്ങൾ എഴുതാൻ സാധ്യതയുണ്ട് എന്ന് കരുതിയിരുന്നു. പക്ഷെ എന്റെ പ്രതീക്ഷകൾക്ക് അതീതമായി അതിശയിപ്പിച്ചുകൊണ്ട് പല പുത്തൻ അറിവുകളും അറിവിലുണ്ടായിരുന്ന പല കാര്യങ്ങൾക്കും പുതിയ വീക്ഷണങ്ങളും നൽക്കാൻ ഈ പുസ്തകത്തിനു കഴിഞ്ഞു. മുഹമ്മദിന്റെ ദീർഘമായ ജീവിതത്തെക്കുറിച്ചും ആത്മീയ ദർശനങ്ങളെപ്പറ്റിയും മാത്രമല്ല മുഹമ്മദിനെക്കുറിച്ചും ഇസ്ലാമിനെക്കുറിച്ചും നൂറ്റാണ്ടുകളായി പാശ്ചാത്യ രാജ്യങ്ങളിൽ പ്രചരിപ്പിച്ച നിരവധി തെറ്റായ പ്രസ്താവനകൾ വിശകലനം ചെയ്യുകയും പലതും വ്യക്തതയോട് വിവരിക്കുകയും ചെയ്തിരിക്കുന്നു. ഏഴാം നൂറ്റാണ്ടിലെ അറേബ്യയിലെ ജീവിതം, പാരമ്പര്യങ്ങൾ, ഗോത്ര സംസ്കാരങ്ങൾ, രാഷ്ട്രീയ നിലപാടുകൾ, പരമ്പരാഗത രീതികൾ എന്നിവയെക്കുറിച്ച് ആംസ്ട്രോങ്ങ് വളരെ വിപുലമായ അറിവുകൾ പകർന്നു നൽകിയിരിക്കുന്നു. ഇസ്‌ലാമിന്റെ ആരംഭത്തെക്കുറിച്ചും മുഹമ്മദിന്റെ പ്രവാചകത്വവും അദ്ദേഹത്തിന്റെ ഭാര്യമാർ, സുഹൃത്തുക്കൾ, ശത്രുക്കൾ, പലായനങ്ങൾ, യുദ്ധങ്ങൾ, തോൽവിയും വിജയവും അങ്ങനെയുള്ള മിക്ക ചർച്ചാ വിഷയങ്ങളും  അവതരിപ്പിച്ചിരിക്കുന്നത് വളരെ ശ്രദ്ധേയമാണ്. ജിഹാദ് എന്ന വാക്കിന്റെ അർത്ഥമാനങ്ങൾ തീവ്രവാദ ഇസ്ലാമിക സംഘടനകൾ വാസ്തവവിരുദ്ധമായി വ്യാഖ്യാനിച്ചതിൽ നിന്ന്കൊണ്ട് ഒരു മതത്തിന്റെയും അതിനെ പിന്തുടരുന്നവരെയും അപൂർണ്ണമായി മനസ്സിലാക്കി പലരും  വിധി കല്പ്പിച്ചു. വാസ്തവത്തിൽ: ഇസ്‌ലാമിന്റെയും മുഹമ്മദിന്റെയും ആരഭ വഴികളും ആത്മീയ വശങ്ങളും   മനസിലാക്കാൻ നിങ്ങൾ ആഗ്രഹിക്കുന്നുവെങ്കിൽ ഈ പുസ്തകം നിങ്ങൾക്കൊരു നല്ല തുടക്കമായിരിക്കും എന്ന് പ്രതീക്ഷിക്കുന്നു. -Sanuj Najoom